Mae’r Geoparc y tu mewn i Barc Cenedlaethol Bannau Brycheiniog yn ne Cymru. Mae’n cynnwys hanner gorllewinol y Parc Cenedlaethol, sy’n ymestyn o Lanymddyfri yn y gogledd i ymyl Merthyr Tudful yn y de, o Landeilo yn y gorllewin i Aberhonddu yn y dwyrain.
Mae’r Fforest Fawr yn ystod o dir ucheldirol a gafodd ei gynnwys ym Mharc Cenedlaethol Bannau Brycheiniog pan gafodd ei ddynodi ym 1957. Mae’r ucheldiroedd hyn ynghanol y Geoparc, er ei fod yn ymestyn y tu hwnt iddynt er mwyn cynnwys llawer o gefn gwlad o’u cwmpas.
Yn wir mae 300 milltir sgwâr / 763 cilometr sgwâr Geoparc y Fforest Fawr yn cynnwys mynyddoedd a rhostir, coedwigoedd a dolydd, trefi a phentrefi, llynnoedd ac afonydd a llawer mwy hefyd.
Dechreuwch eich archwiliad o’r Geoparc drwy archwilio’r tudalennau hyn:
- Bydd Deall yn rhoi gwybodaeth i chi am bob math o bynciau.
- Bydd Mwynhau yn rhoi syniadau i chi o leoedd i’w gweld a phethau i’w gwneud.
- Mae’r adran Gofalu yn disgrifio sut caiff yr ardal ei diogelu a sut y gallwch chi helpu.
- Mae Addysg ar gyfer y rhai sydd eisiau defnyddio’r Geoparc fel ystafell ddosbarth awyr agored.
- Mae Beth sy’n digwydd yn rhoi manylion o deithiau a sgyrsiau a digwyddiadau eraill sydd ar ddod – gan gynnwys Gŵyl Flynyddol Geoparc y Fforest Fawr ar ddiwedd mis Mai/dechrau mis Mehefin.
- Caiff Newyddion Geoparc y Fforest Fawr — cylchlythyr ar gyfer yr ardal — ei gyhoeddi ddwywaith y flwyddyn.
Pan fyddwch yn gwybod ychydig yn fwy byddwch yn barod i ymweld â ni. Nawr, mae dod yma yn rhwydd!
Ewch ar y trên!
Mae Rheilffordd Calon Cymru yn rhedeg ar hyd Cwm Tawe. Mae’r Geoparc o fewn cyrraedd rhwydd o’r gorsafoedd ar y rheilffordd hon yn Llanymddyfri, Llangadog, Llandeilo a Rhydaman. Mae gorsafoedd hefyd ym Merthyr Tudful yng nghornel de-ddwyreiniol yr ardal ac mae’r Fenni i’r dwyrain ar Reilffordd Casnewydd i Henffordd. Ewch i Ymholiadau Rheilffordd Cenedlaethol i gael manylion o’r gwasanaethau.
. . neu ar y bws!
Mae nifer o wasanaethau bysiau sy’n rhedeg trwy’r Geoparc. Ewch i Traveline Cymru i gael rhagor o wybodaeth. Mae gwasanaethau Bws y Bannau arbennig yn gweithredu trwy’r haf ac maent yn rhoi cyfle ardderchog i gerddwyr ddod i adnabod yr ardal yn well.
Gallech chi ddod yn y car.
Mae’r A40 yn rhedeg o’r Fenni i Aberhonddu, wedyn ar hyd ymyl ogleddol y Geoparc i Lanymddyfri a Llandeilo. Mae A465, sef ‘Ffordd Blaenau’r Cymoedd’ yn rhedeg ar hyd ymyl deheuol y Geoparc o Ferthyr Tudful i Gwm Nedd. Mae modd cyrraedd rhan orllewinol y Geoparc o ddiwedd yr M4 o fewn 30 munud.
. . . ond beth am feicio?
Mae’r Rhwydwaith Beicio Cenedlaethol yn ehangu trwy’r amser ac mae nifer o lwybrau sy’n cysylltu â Geoparc y Fforest Fawr. Gwnewch les i chi eich hun ac i’r amgylchedd – ewch ar y beic!